A1News.am-«Առաջին լրատվական»-ի հարցերին պատասխանել է ՀՀ էկոնոմիկայի նախկին նախարար Արմեն Եղիազարյանը:
Պարոն Եղաիազարյան, վերջին օրերին դոլարն ու եվրոն կտրուկ արժեզրկվում են, մասնագետներն արդեն մտահոգություն են հայտնում, որ դրանով ԿԲ-ն սնանկացնում է տեղական արտադրողներին ու բնակչությանը: Դուք այստեղ վտանգներ տեսնո՞ւմ եք, թե՞ ոչ:
Նախևառաջ, ասեմ, որ դոլարը աճելու է: Այսպես կոչված, քանակական կոշտացում են հիմա արվում, այսինքն շրջանառությունից հանում են դոլարը, զանգվածը պակասեցնում են, հետևաբար, ուր որ է, դոլարը կսկսի նորից աճել; Կենտրոնական բանկն այդ մասին չպետք է մտածի, Կառավարություն կա, իրենք պետք է համապատասխան ռազմավարություն մշակեն, որ արտահանողները չտուժեն: Կենտրոնական բանկի քաղաքականությանը գնաճին է ուղղված, ոչ թե փոխարժեքին:
Նաև նշվում է, որ դրամի արժևորումը պայմանավորված է նաև օտարերկրացիների ներհոսքով:
Այդ դեպքում դոլարը պետք է թանկանա, եթե պահանջարկն ավելանում է, պետք է թանկանա: Ռուսները գալիս են, ռուբլին փոխում են դրանի, դրամով էլ դոլար են առնում: Այստեղ երևի սպեկուլյացիաների հետ գործ ունենք, դոլարային ավանդների ռեզերվացում և այլն: Սա ժամանակավոր երևույթ է, դոլարը թանկանալու է:
Բայց մենք լողացող փոխարժեքի քաղաքականություն ենք վարում:
Այո, լողացող քաղաքականություն է, բայց ինտերվենցիաները ոչ ոք չի արգելել: Ես լրջորեն չեմ ուսումնասիրել այս հարցը, բայց տեսականորեն դոլարը չպետք է այսպես արժեզրկվեր և մոտակա ժամանակներին ինքը պետք է աճի:
Միջազգային արտարժույթի շուկայում դոլարն աճում է, մինչդեռ Հայաստանում հակառակ պրոցեսն է:
Հայաստանում ո՞նց կարող է հակառակը լինել, դա նշանակում է, որ դոլարը ծախում, դրամ են առնում: Երևի ինչ-որ պահի ինտերվենցիա են արել, դոլար են նետել շուկա: Ամեն դեպքում սա երկար չի տևի, իրավիճակը կնորմալանա:
Մյուս կողմից տեսնում ենք, որ ռուսական ռուբլու անկումը զսպվում է:
Որովհետև ռուբլու ռեալ վաճառք չկա, սահմանափակումներ կան, պահանջարկը իջել է, ներմուծումը պակասել է: Այսինքն ռուբլու փոխարժեքը ոչ մի բանի մասին չի խոսում, դա ոչ մի լուրջ բան չի նշանակում: Ռուսաստանի կենտրոնական բանկն էլ վերաֆինանսավորման տոկոսադրույթը հասցրել է 20 տոկոսի: Այսինքն մի քանի գործոն կա, մի կողմից արհեստականորեն թանկացրել են, սահմանափակել են, չեն թողնում արտասահմանում շուկայում գործարքներ անել, փակել են կապիտալի արտահոսքը, դրա համար էլ կայունացրել են: Դա ոչ մի ռեալ խնդիր չի լուծում: Կայունացրել են, որ խուճապ չլինի:
Հատկապես, որ տրանսֆերտների մեծ մասը Հայաստան գալիս է ՌԴ-ից և հենց ռուբլով:
Այո, ռուբլով է գալիս, դոլարով չեն էլ կարող ուղարկել: Ես չեմ կարծում, թե խուճապի առիթ կա:
