A1News.am-Անահիտ Սիմոնյանը նոր ֆոտոշարք ունի, որն էլ տրամադրել է BRAVO.am-ին եւ մի փոքր զգացմունքային զրույց ունեցել մեզ հետ: Դիզայներ-երգչուհու հետ զրուցել ենք որդու՝ Արմանի հետ մտերմության, նախկին ամուսնու՝ երգիչ Հայկոյի հետ այժմյան հարաբերությունների, աշխատանքի եւ երջանիկ լինելու իր բանաձեւի մասին:
Վերջին շրջանում անընդհատ մեզ հանդիպող դժվարություններն ու կորուստները Անահիտին ստիպել են այլ աչքերով նայել ամեն ինչին եւ գնահատել կյանքի յուրաքանչյուր պահը.«Պատերազմից հետո մարդիկ սկսեցին գնահատել կյանքը: Անձամբ ես հասկացա, թե ինչ է նշանակում զգալ ցավ, ապրել վախի եւ անդառնալի կորուստների մեջ, ունենալ ամեն ինչ՝ միաժամանակ չունենալով ոչինչ»,-ասում է նա:
Կյանքում Անահիտն առաջնորդվում է հետեւյալ բանաձեւով՝ «Երբեք չլինել երեկվա մարդը, եթե այսօրվանն ավելի լավն է, երբեք չզղջալ ոչնչի համար, չնայել անցյալին եւ չփորձել տեսնել ապագան, այլ ապրել ներկայով», վստահ է՝ մարդը երջանիկ է այն ժամանակ, երբ ներդաշնակ եւ խաղաղ է ինքն իր հետ.«Մնացած ամեն ինչ լրացումներ են, որոնք կարող են լինել, կամ՝ ոչ: Իսկ իմ երջանկության գրավականը որդուս եւ հարազատներիս ներկայությունն է իմ կյանքում: Ամեն մարդ երջանիկ է յուրովի, եւ յուրաքանչյուրն ունի երջանիկ լինելու պատճառ ու հիմք»:
Որդու՝ դպրոցական Արմանի մասին հիացմունքով է խոսում, նշում է՝ իրենք շատ լավ ընկերներ են, սիրում են ակտիվ ու հետաքրքիր ժամանց կազմակերպել միասին, բայց մարդաշատ վայրերից կարող են արագ հոգնել եւ շտապել տուն՝ ավելի հանգիստ միջավայրում շփվելու համար.«Արմանն իր գաղտնիքներն ու իրեն հուզող հարցերը քննարկում է ինչպես ինձ, այնպես էլ հայրիկի հետ. երկուսիս էլ հավասարապես վստահում է»:
Նախկին ամուսիններն անում են ամեն ինչ, որ երեխան պառակտման նշույլ անգամ չզգա եւ չլարվի.«Լինելով հասուն ու կիրթ մարդիկ, կարեւորելով մեր երեխայի հոգեբանական վիճակը՝ փորձում ենք մեզ պահել այնպես, որ իրեն ապահով զգա: Մենք անգամ մի քանի օր հաճախել ենք մանկական հոգեբանի մոտ, ով մեզ ասաց, որ երեխան բացարձակ ոչ մի խնդիր ու լարվածություն չունի: Նա շատ երջանիկ ու ներդաշնակ է, սակայն վստահ եմ, որ եթե ծնողները չկարեւորեն երեխայի հոգեբանական վիճակը, միանշանակ, բաժանումը նրա վրա բացասական ազդեցություն կթողնի»:
Անահիտը խոսեց նաեւ ամուսնալուծությունից հետո իր եւ նախկին ամուսնու հարաբերությունների մասին.«Կատարյալ հարաբերություններ ունենք. ավելի լավ չի լինում, անգամ հիմա ավելի լավ է, քան առաջ էր»,-ասում է նա, ապա հավելում, որ կյանքում պատմություններն ու իրավիճակներն այնքան տարբեր են, երբեք չես իմանա, թե ինչ կլինի, սակայն ամեն դեպքում, բաժանվելուց հետո վերադառնալ հին կետին եւ միանալ, համարում է սխալ որոշում:
«Ես աշխատել եւ շարունակում եմ աշխատել հոգեբանի հետ, որին շատ սիրում եւ վստահում եմ: Հենց նրա շնորհիվ էլ այսօր ինձ զգում եմ լիարժեք ու երջանիկ: Ի դեպ, նույնը խորհուրդ եմ տալիս բոլոր այն աղջիկներին ու կանանց, ովքեր նման իրավիճակներում հայտնվել են»,-նշում է երգչուհին:
