A1News.am-Armlady.am-ն այս անգամ անդրադարձել է հայկական շոու բիզնեսի այն կին ներկայացուցիչներին, ովքեր հրաշքով են փրկվել:
Անի Պետրոսյան
Դերասանուհի Անի Պետրոսյանը ծնվել ու մեծացել է Գյումրիում: 1988 թվականի Սպիտակի ավերիչ երկրաշարժի ժամանակ Անին դպրոցում էր: Նա ընդամենը 7 տարեկան էր:
Դասի ժամանակ նրա դասղեկն անընդհատ հետաձգել է դպրոցի մյուս կորպուս տեղափոխվելու գործընթացը, ինչի շնորհիվ էլ փրկել է շատ երեխաների կյանքեր:
Եթե նա այդ քայլին չգնար, ամբողջ դասարանից ոչ ոք ողջ չէր մնա, քանի որ այն կորպուսից, որտեղ պետք է տեղափոխվեր Անիենց դասարանը, ոչ ոք չի փրկվել:
Երկրաշարժի պահին Անիի ուսուցիչը նույնիսկ իր երեխաների մոտ չի վազել մինչեւ այն պահը, երբ սաներից ամեն մեկին հանձնել է իր ծնողին:Անին մինչ օրս անկեղծ խոստովանում է, որ կյանքով է պարտական իր դասղեկին:
Լիա Զախարյան
Դերասանուհի Լիա Զախարյանի կյանքում 2020 թվականը, կարծես թե, ճակատագրական կարող էր լինել:
Դերասանուհին օգոստոսին իր հանգիստն էր վայելում Հայաստանի գեղատեսիլ վայրերում, որից պարբերաբար լուսանկարներ ու տեսանյութեր էր հրապարակում:
Նա ինստագրամյան իր էջի ուղիղ եթերով ցույց էր տվել Սատանի կամուրջ կոչվող վայրն ու դրա գեղեցկությունը:
Ուղիղ եթերի ժամանակ տեղի էր ունեցել անսպասելին. տեսանյութում երևում էր, թե ինչպես է դերասանուհու ոտքը սայթաքում, եւ նա ընկնում է ջրի մեջ։
Դրանից հետո մի քանի օր շարունակ Լիան որևէ հրապարակում չէր անում, ինչը անհանգստացրել ու վախեցրել էր նրա հետևորդներին:
Օրեր անց դերասանուհին տեսաուղերձով էր հանդես եկել,որում նշել էր, որ իր հետ ամեն ինչ կարգին է, սակայն ինքը հրաշքով է փրկվել:
Իրինա Հարությունյան
Երգչուհի Իրինա Հարությունյանը այս տարվա ամռանը սարսափելի ավտովթարի էր ենթարկվել:
Երևան-Գյումրի ճանապարհին երգչուհու մեքենան ընկել էր ձորը:
Իրինայի հետ էին նաև նրա մայրն ու որդին:
«Ավտովթարի մեղավորը ես չէի, դիմացս բեռնատար դուրս եկավ: Արագ չէի վարում, ընթանում էի 40 կմ\ժ արագությամբ, քանի որ ճանապարհաշինարարություն էր տեղի ունենում, ամբողջ ճանապարհը ավազ էր, մեքենայի հավասարակշռությունը կորցրի, ու մենք գլորվեցինք ձորը»,- պատմել է երգչուհին:
Իրինան խոստովանել է, որ իրենք հրաշքով են ողջ մնացել:
Թամարա Գևորգյան
Դերասանուհի Թամարա Գևորգյանի սարսափելի վթարի մասին լուրը օրեր շարունակ համացանցի թիվ մեկ քննարկման թեման էր:
Վթարը տեղի էր ունեցել հուլիս ամսին։ Ժամը 18։30-ի սահմաններում Թամարան իր Nissan Teana մակնիշի ավտոմեքենայով Մարգարա-Վանաձոր-Տաշիր ավտոճանապարհին դուրս էր եկել ճանապարհի երթևեկելի գոտուց, բախվել երկաթբետոնե արգելապատնեշներին և մասամբ հայտնվել դաշտում։
Դերասանուհու խոսքով՝ ինքն արագ չի վարել մեքենան, պարզապես կորցրել է մեքենայի կառավարումը։
Թամարան հրաշքով է փրկվել սարսափելի վթարից, ավելին՝ կանգնած է եղել ոտքը կորցնելու վտանգի առաջ։
Դերասանուհին 3 անգամ ենթարկվել է վիրահատության։
Սարսափելի վթարից միայն ամիսներ անց Թամարան կարողացել է քայլել «Հրեշը լուսնի վրա» ներկայացման պրեմիերային:
