A1News.am-Միհրան Ծառուկյան և Արփի Գաբրիելյան աստղային զույգի կյանքն ու գործունեությունը մշտապես հանրության ուշադրության կենտրոնում է եղել, իսկ Միհրան Ծառուկյանի անձնական կյանքը միշտ եղել է նրա երկրպագուների քննարկման կիզակետում։
Լիլիթ Հովհաննիսյան, Մերի Մակարյան, Շուշաննա Թովմասյան, այնուհետև Արփի Գաբրիելյան. սրանք հանրությանը հայտնի այն կանայք են, ում հետ լսարանը կապել է Միհրանին, սակայն Միհրանը մշտապես հերքում էր իրեն վերագրվող սիրավեպերը:
Աստղային զույգը միասին հանդես է եկել տարբեր սիթքոմներում: Զույգի համատեղ գործունեությունը սկսվել է «Ֆուլ հաուս» սիթքոմից, որից հետո էլ հերոսների մտերմությունը տարատեսակ խոսակցությունների առիթ տվեց՝ նրանց իրական կյանքում ևս սիրավեպ վերագրեցին, որը, փաստորեն, ժամանակի ընթացքում իրականություն դարձավ: Աստղային զույգը երբեք շատ չի խոսում իրենց ծանոթության, անձնական կյանքի մանրամասների մասին, սակայն օրերս հաղորդումներից մեկի ժամանակ Միհրանն ու Արփին անկեղծացել են իրենց հարաբերությունների, ընտանեկան կյանքի, բարդություններիի և իրենց որու՝ Ռոբերտի մասին:
Արփիի խոսքով՝ երբ 2 հանրային մարդ համատեղ կյանք են սկսում, առաջնահերթ պետք է միմյանց լավ ճանաչեն, հակառակ դեպքում՝ բարդություններն անխուսափելի կլինեն: Արփին վստահեցրել է, որ ինքն ու Միհրանն իրար շատ լավ են ճանաչում, գիտեն միմյանց առավելություններն ու թերությունները, ինչի շնորհիվ էլ կարողացել են ամուր ընտանիք ստեղծել:
Երգչուհու պնդմամբ՝ ամուսնությունից հետո իրենց հարաբերությունները ավելի ջերմացան: «Լիովին վերացան կռիվները, շատ ավելի համերաշխ ենք»,-խոստովանում է Արփին: Անդրադառնալով իրենց որդուն՝ 10 ամսական Ռոբերտին, Միհրանը խոստովանել է, որ հիմա մշտապես շտապում է տուն՝ ազատ ժամանակի յուրաքանչյուր րոպեն որդու հետ վայելելու համար:
Հիշեցնենք, որ Միհրան Ծառուկյան և Արփի Գաբրիելյանն ամուսնացել են 2019 թվականին: Նույն տարվա նոյեմբերի 17-ին Միհրան Ծառուկյանն իր մենահամերգի ընթացքում Արփի Գաբրիելյանի հետ զուգերգից հետո, անակնկալ կերպով ամուսնության առաջարկ էր արել նրան՝ մատանի նվիրելով:
