A1News.am-Այսօր տարօրինակ երեւույթ է դիտարկվել Սյունիքի մարզում. Շաքիի ջրվեժից սեւ ջուր է հոսել: Ֆեյսբուքյան օգտատերերը տեսանյութ են տարածել, որին արձագանքել է ՀՀ Շրջակա միջավայրի նախարար Ռոմանոս Պետրոսյանը եւ այս երեւույթը մեկնաբանել նրանով, որ Շաքիի ջրվեժի վերևում գտնվող ավազանի մաքրման աշխատանքներ են կատարվում, և ավազանի հատակին կուտակված տիղմը և նստվածքները մաքրվում են ու ջրի հետ հոսում:
«Շաքիի ջրվեժի «սևանալու» կապակցությամբ մտահոգվելու կարիք չկա, ջրի գույնի փոփոխությունը պայմանավորված է ջրվեժի ավազանում կատարվող ամենամյա մաքրման աշխատանքներով:
Տարին մեկ անգամ Շաքիի ջրվեժի վերևում գտնվող ավազանի մաքրման աշխատանքներ են կատարվում, և ավազանի հատակին կուտակված տիղմը և նստվածքները մաքրվում են ու ջրի հետ հոսում: Դրա հետ կապված ջուրը որոշ ժամանակ նման գույն է ստացել»,- գրել է նա իր ֆեյսբուքյան էջում։
NEWS.am-ի հետ զրույցում բնապահպան Սիլվա Ադամյանն ասաց, որ ինքն առաջին անգամ է նման երեւույթի հանդիպում եւ այնքան էլ չի վստահում նախարարի պարզաբանմանը:
«Ինձ նման պարաբանումը չի բավարարում, հնարավոր է, որ նախարարի նշված պատճառով լինի այս երեւույթը, սակայն պետք է ջրի փորձաքննություն անել, որպեսզի այլ պատճառները բացառելի լինեն»,-ասաց նա:
