A1News.am-Ռուսաստանի քննչական կոմիտեն տեսանյութ է հրապարակել Ստավրոպոլի երկրամասի Ճանապարհային երթևեկության անվտանգության պետական տեսչության ձերբակալված պետ Ալեքսեյ Սաֆոնովի տնից:
Կադրերում երևում է մի քանի սենյակ՝ ոսկեզօծ ինտերիերով, մեծ գումար և առանձնատան դիմաց կայանված արտասահմանյան թանկարժեք մեքենաներ: РИА Новости գործակալությունը հաղորդում է, որ ըստ քննիչների՝ ճանապարհային ոստիկանության պետը գլխավորում էր հանցավոր խումբ, որի անդամները մի քանի տարի շարունակ Ստավրոպոլի երկրամասում հացահատիկ և իներտ նյութեր փոխադրողներին տրամադրում էին անցաթղթեր, ինչը թույլ էր տալիս բեռնափոխադրումներ կատարել օրենքի խախտմամբ:
Ընդհանուր առմամբ, կազմակերպված հանցավոր խմբի անդամներն իրենց ծառայությունների համար ստացել են ավելի քան 19 միլիոն ռուբլի: Հարուցվել է քրեական գործ հատկապես խոշոր չափերով կաշառք ստանալու մասին հոդվածով:
Ձերբակալվել են Սաֆոնովը և խմբի վեց անդամներ, այդ թվում՝ ճանապարհային երթևեկության անվտանգության պետական տեսչության վարչության նախկին ղեկավար Ալեքսանդր Արժանուխինը, նույն վարչության տեսուչ Վիտալի Մելչիկովը և չորս քաղաքացիական անձինք: Սաֆոնովին սպառնում է ազատազրկում մինչև 15 տարի ժամկետով և տուգանք՝ ստացված կաշառքի մինչև 70-ապատիկի չափով, այսինքն՝ ավելի քան 1.3 միլիարդ ռուբլի:
