A1News.am-Հուլիսի 14-ին Սյունիքի մարզից Սճ լճի տարածքից անհետացած երկու հայ զինծառայողի որոնողական աշխատանքները շարունակվում են, նոր տեղեկատվություն առկա չէ: Այս մասին NEWS.am-ին հետ զրույցում հայտնեցին ՀՀ պաշտպանության նախարարությունից:
«Նոր տեղեկատվություն դեռևս չկա, համապատասխան աշխատանքները շարունակվում են»,- հայտնեցին պաշտպանական գերատեսչությունից:
Հիշեցնենք, որ հուլիսի 14-ի լուսադեմին մառախուղի պայմաններում ամրակցված զինվորական ավտոմեքենայով ծառայողական պարտականությունները կատարելու ընթացքում կորել էր կապը Հայաստանի Հանրապետության հարավ-արևելյան ուղղությամբ տեղակայված ՀՀ ԶՈւ N զորամասի զինծառայող Արթուր Նալբանդյանի և վարորդ Արամայիս Տոռոզյանի հետ։
Ըստ պաշտպանության նախարարության՝ այդ օրերին տարածած հաղորդագրությունների՝ ռուսական կողմի միջնորդությամբ Ադրբեջանի ԶՈւ ներկայացուցիչների հետ քննարկվում է Ա. Նալբանդյանի և Ա. Տոռոզյանի՝ ադրբեջանական տարածքում հայտնվելու հավանականությունը:
Զինծառայողները, ինչպես հայտնել էին ՀՀ ՊՆ-ից, եղել էին առանց զենքի:
